मुंबई शिवसत्ता टाइम्स (वार्ताहर):-
आज साडे तीन मुहुर्तांपैकी एक असणारा दसरा सण आज साजरा होत आहे. ऐन विधानसभा निवडणुकीच्या तोंडावर आज राज्यात दसरा मेळावे होत आहेत. मुंबईत उद्धव ठाकरे यांचा दसरा मेळावा शिवाजी पार्कवर होणार आहे. आझाद मैदानावर शिवसेना शिंदे गटाचा दसरा मेळावा होणार आहे. या मेळाव्याला मुख्यमंत्री एकनाथ शिंदे संबोधित करणार आहेत. तर तिकडे बीडमध्येही दोन दसरा मेळावे होणार आहेत. बीडमधील भगवान भक्ती गडावर पंकजा मुंडे यांचा दसरा मेळावा होणार आहे. तर बीडच्या नारायण गडावर मराठा आंदोलक मनोज जरांगे पाटील यांचा मेळावा होणार आहे. त्यामुळे आजच्या राज्यात राजकीय दसरा मेळाव्यामध्ये आव्वाज कुणाचा? हे पाहणं महत्वाचं असणार आहे.मुंबईतील शिवाजी पार्कवर होणारा दसरा मेळावा ही शिवसेनेची परंपरा आहे. यंदाही शिवसेना ठाकरे गटाचा दसरा मेळावा शिवाजी पार्कवर होणार आहे. या मेळाव्यात उद्धव ठाकरे काय बोलणार? याकडे सर्वांचेच लक्ष असणार आहे. पण या मेळाव्यावर पावसाचं सावट दिसतं आहे. मागचे दोन दिवस मुंबईत मुसळधार पाऊस झालाय. त्यामुळे शिवाजी पार्कवरही पाणी साचले होते. आताही शिवाजी पार्कवर चिखल असल्याचे पाहायला मिळत आहे. त्यामुळे संध्याकाळी होणाऱ्या मेळाव्याकडे लक्ष लागलं आहे.विधानसभा निवडणुकीच्या पार्श्वभूमीवर होणाऱ्या दसरा मेळाव्याकडे सर्वांचं लक्ष आहे. शिवसेना शिंदे गटाचा आझाद मैदानावर दसरा मेळावा पार पडणार आहे. आझाद मैदानावर शिवसेना शिंदे गटाच्या दसरा मेळाव्याची तयारी अंतिम टप्प्यात आली आहे. भव्य असा स्टेज उभारला आहे. स्टेजच्या बाजूला 7 मोठे एलईडी स्क्रिन लावण्यात आल्या आहेत. आझाद मैदानावर सर्वत्र बॅरिकेटिंग करून, दीड ते दोन लाख शिवसैनिक बसतील एवढी आसन व्यवस्था करण्यात आली आहे. आझाद मैदानावरील दसरा मेळाव्यात राज्याचे मुख्यमंत्री एकनाथ शिंदे या दसरा मेळाव्यातून विधानसभा निवडणुकीचे काय रणशिंग फुकतील? शिवसैनिकांना कोणता कानमंत्र देणार याकडे सर्वांचे लक्ष लागले आहे.
