पेण शिवसत्ता टाइम्स (देवा पेरवी):-
अचानक बेपत्ता झालेली 4 वर्षीय किशोरी अखेर 48 तासानंतरच्या अथक प्रयत्नांनी घटदाट जंगलात रडत असताना सापडली आहे. पेण तालुक्यातील हेटवणे वाडी येथील 4 वर्षाची चिमुकली बुधवारी तीन दिवसांपूर्वी सकाळी आई सोबत प्रातर्विधी साठी गेल्यानंतर अचानक बेपत्ता झाल्याची धक्कादायक घटना घडली होती. मात्र पोलीस, रेस्क्यू टीम, ड्रोन टीम, डॉगस्कॉड, सामाजिक संघटना व 200 हुन अधिक तरुण-जेष्ठ ग्रामस्थांच्या अथक प्रयत्नांनंतर अखेर हेटवणेच्या घनदाट जंगलात रडत बसलेली असताना सापडली आहे.
सदर घटनेची सविस्तर बातमी अशी की, बुधवार दिनांक 12 नोव्हेंबर रोजी सकाळी आठ वाजण्याच्या सुमारास किशोरी किरण महालकर वय 4 वर्षे 6 महिने ही चिमुरडी आपल्या आई सोबत गावाबाहेर एका नाल्या शेजारी प्रातर्विधी साठी गेली असता अचानक गायब झाली होती. या चार वर्षाच्या चिमुकलीने एकदा आवाज दिला आई कुठे आहेस तू ?…आई म्हणाली बाळा आलोच मी…या फक्त 2 मिनिटांच्या वेळात ही चिमुकली अचानक बेपत्ता झाली होती. त्यानंतर किशोरी दिसेनाशी झाल्याने आईने आरडा ओरडा करायला सुरुवात केली होता. मात्र अनेक तास होऊन गेले तरी मुलगी घरी येत नाही म्हणून गावकऱ्यांनी शोधकार्य सुरू केले. गावाला लागून घनदाट जंगल असल्याने गावकऱ्यांनी संपूर्ण परिसर शोधून काढला. परंतु मुलीचा कुठेही थांगपत्ता लागला नव्हता. त्यानंतर नातेवाईकांनी पोलिस ठाण्याशी संपर्क केला असता पोलीस, क्यूआरटी, आरसिपी पथक, रेस्क्यू टीम, ड्रोन टीम, डॉगस्कॉड, फॉरेस्ट अधिकारी, स्थानिक सामाजिक संघटना व 250 हुन अधिक तरुण-जेष्ठ ग्रामस्थ घटना स्थळी दाखल होऊन दिवस-रात्र तपास सुरू होता. यावेळी गावाला लागूनच असलेल्या हेटवणे वाडीच्या घनदाट जंगलात शोध घेत असतानाच मुलीची चप्पल आणि कपडे सापडल्याने किशोरीच्या तपासाला वेग आला होता. अखेर शुक्रवारी तिसऱ्या दिवशी सकाळी 10 च्या सुमारास जंगलात किशोरी रडत असलेली पोलीस व ग्रामस्थांना सापडली. तिला तात्काळ हेटवणे वाडीत आणून अधिक उपचारार्थ उपजिल्हा रुग्णालय पेण येथे आणण्यात आली. मात्र सदर मुलगी तीन दिवस कुठे होती? अन्नपाणी वाचून कशी राहिली ? तिच्या बरोबर नक्की काय घडले ? अशी अनेक प्रश्नांची उत्तरे पोलीस शोधत आहेत.
रायगड पोलिस अधीक्षक आंचल दलाल, अप्पर पोलीस अधीक्षक अभिजित शिवथरे, उपविभागीय पोलीस अधिकारी जालिंदर नालकुल, गुरुनाथ साठेलकर यांची हेल्प रेस्क्यू टीम, सीआरपी, क्यूआरटी, श्वान पथक, ड्रोनटीम, फॉरेस्ट अधिकारी, पोलीस पाटील टीम, परिसरातील सामाजिक संघटना आणि 250 हुन अधिक तरुण-जेष्ठ ग्रामस्थ यांच्या अथक प्रयत्नांच्या शोधमोहीमेला अखेर यश मिळाले.