रोहा शिवसत्ता टाइम्स (वार्ताहर):-
रोहा नगरपरिषद निवडणुकीत प्रभाग क्रमांक 9 मध्ये इच्छुक उमेदवार म्हणून रोशन चाफेकर यांची जोरदार चर्चा सुरू आहे. प्रभागातील नागरिकांना भेटीत त्यांनी सरळ आणि स्पष्ट शब्दांत सांगितलं की — राज्यातही आमचं सरकार, केंद्रातही आमचं सरकार. त्यामुळे कोणत्याही सरकारी योजनेत प्रभागातील नागरिकांना अडचण येऊ देणार नाही. तुमच्या हक्काच्या सर्व योजना तुमच्यापर्यंत पोहोचवण्याची जबाबदारी मी स्वतः घेणार आहे.
रोशन चाफेकर यांनी नागरिकांना सांगितलं की लाडकी बहिण योजना, आयुष्मान भारत योजना, शिक्षणासाठी मिळणाऱ्या शिष्यवृत्ती, विद्यार्थ्यांसाठीच्या विविध योजना, इंजिनिअरिंग-मेडिकल शिक्षणासाठी लागणारी मदत — या सर्व गोष्टी प्रभागातील प्रत्येक पात्र व्यक्तीपर्यंत पोहोचवण्याचा त्यांचा प्रयत्न असेल.
आरोग्य सुविधा देताना त्यांनी स्पष्ट केलं की गरज पडल्यास दवाखान्याचं बिल योजनांमधून माफ करून देण्यासाठी पूर्ण मदत केली जाईल. कोणतीही शासकीय कागदपत्रं, प्रमाणपत्रं किंवा योजना अर्ज करताना कुणालाही भटकंती करावी लागू नये, यासाठी थेट मार्गदर्शन आणि सहाय्य उपलब्ध करणार असल्याचं त्यांनी सांगितलं.
रोशन चाफेकर यांच्या म्हणण्यानुसार, केंद्रात राज्यात भाजप सत्तेत आहे. मुंबईतील मंत्रालयापासून ते दिल्लीपर्यंत संपर्क असल्यामुळे पक्ष नेतृत्व आमच्या पाठीशी आहे त्यामुळे कोणत्याही शासकीय कामात प्रभागातील नागरिकांना त्रास होणार नाही, ही हमी त्यांनी दिली आहे.
स्थानीकांमध्ये लोक आत्ता बोलत आहेत प्रादेशिक ओळख, शासकीय संपर्क आणि योजनांची माहिती असलेला प्रतिनिधी मिळाल्यास प्रभागातल्या लोकांना खरंच दिलासा मिळेल असा सूर दिसत आहे… प्रभाग 9 मध्ये यावेळी जनतेकडून मिळत असलेल्या प्रतिसादामुळे रोशन चाफेकर यांचं नाव जोरदार चर्चेत आहे.