महाड शिवसत्ता टाइम्स (रेश्मा माने):-
महाड तालुक्यात नाते येथील एका ७६ वर्षीय वृद्ध महिलेच्या खून प्रकरणाचा महाड शहर पोलिसांनी अवघ्या ८ तासांत छडा लावला आहे.दागिने आणि मोबाईल हिसकावण्याच्या उद्देशाने गळा दाबून खून करणाऱ्या आरोपीला पोलिसांनी अटक केली असून, तो मयत महिलेच्या नातेसंबंधातीलच असल्याची माहिती समोर येत आहे.काल (रविवार) सकाळी महाड शहर पोलीस ठाण्यात नाते, ता. महाड येथील काही अंतरावर वाड्याजवळ एक ७६ वर्षीय महिला मृत अवस्थेत आढळल्याची खबर मिळाली. पोलिसांनी तातडीने घटनास्थळी धाव घेतली आणि मृतदेह महाड ग्रामीण रुग्णालय येथे शवविच्छेदनाकरिता आणला.सुरुवातीला पोलिसांनी आकस्मिक मृत्यूची (ADR) नोंद केली होती. मात्र, मयत लीलावती बलकवडे यांच्या नातेवाईकांनी हा आकस्मिक मृत्यू नसून खून झाल्याचा संशय व्यक्त करत रुग्णालयात गोंधळ केला आणि ही माहिती प्रसारमाध्यमांना दिली.या माहितीची दखल घेत पोलीस निरीक्षक रमेश तडवी यांच्या नेतृत्वाखालील पथकाने तपासाची चक्रे वेगाने फिरवली. तपासात असे निष्पन्न झाले की, लीलावती बलकवडे या परवा (शनिवार) सायंकाळी आपल्या शेतातील वाड्याजवळ काम करण्याकरिता गेल्या होत्या.आरोपीने लीलावती यांचा पाठलाग केला आणि त्या एकट्या असल्याचा फायदा घेऊन त्यांच्या अंगावरील दागिने हिसकावण्याचा प्रयत्न केला.या झटापटीत आरोपीने त्यांचा गळा दाबून खून केला आणि अंगावरील दागिने व मोबाईल घेऊन तो पसार झाला.पोलिसांनी तांत्रिक माहिती आणि गुप्त बातमीदारांच्या आधारे तपास करत अवघ्या आठ तासांमध्ये हत्या करणाऱ्या आरोपीचा शोध घेतला. सुरुवातीला आरोपी गुन्हा कबूल करण्यास नकार देत होता, मात्र पोलिसांनी खाक्या दाखवताच त्याने खुनाची कबुली दिली.अटक करण्यात आलेल्या आरोपीचे नाव अभिजीत महेश अंबवले (रा. नाते) असे आहे. आरोपी आणि मयत महिला यांच्यात नातेसंबंध असल्याचे समजते.आरोपी अभिजीत अंबवले याच्या विरोधात भारतीय न्याय संहिता कलम १०३ (१), ३०९ (४) आणि ३११ प्रमाणे गुन्हा दाखल करण्यात आला आहे. त्याला आज न्यायालयात हजर करण्यात येणार असल्याची माहिती पोलिसांनी दिली आहे.महाड उपविभागीय अधिकारी शंकर काळे यांच्या मार्गदर्शनाखाली पोलीस निरीक्षक रमेश तडवी हे या संपूर्ण गुन्ह्याचा अधिक तपास करत आहेत.