महाड शिवसत्ता टाइम्स (निलेश लोखंडे):-
राजमाता जिजाऊ माँसाहेब यांच्या जयंतीनिमित्त ग्रामपंचायत तलोशी येथे भव्य रक्तदान शिबिराचे आयोजन करण्यात आले. समाजात सामाजिक बांधिलकी, सेवाभाव आणि आरोग्याबाबत जनजागृती करण्याच्या उद्देशाने आयोजित करण्यात आलेल्या या शिबिराला ग्रामस्थांसह तरुण वर्गाकडून उत्स्फूर्त प्रतिसाद मिळाला. या उपक्रमामुळे गावात सामाजिक ऐक्याचे आणि सेवाभावाचे सुंदर दर्शन घडले.
हे रक्तदान शिबिर ग्रामपंचायत तलोशी, जनकल्याण रक्त केंद्र महाड तसेच मुख्यमंत्री समृद्ध पंचायतराज अभियान अंतर्गत आयोजित करण्यात आले होते. शिबिराचे उद्घाटन पंचायत समिती महाडचे गटविकास अधिकारी श्री. उदयसिंग साळुंखे यांच्या हस्ते करण्यात आले. यावेळी जनकल्याण रक्तपेढीचे मॅनेजर महेश मोरे, सहाय्यक गटविकास अधिकारी रवींद्र जाधव, विस्तार अधिकारी श्री. दशरथ वाघजोडे, सरपंच सौ. साक्षी सचिन पार्टे, माजी सरपंच संतोष पार्टे, माजी सभापती सौ. वनिता दिलीप पार्टे, ग्रामपंचायत अधिकारी संदीप बागडे, सचिन गोपीनाथ पार्टे, मार्गदर्शक गणेश खातू, ग्रामपंचायत सदस्य तसेच अन्य मान्यवर उपस्थित होते.
राजमाता जिजाऊ माँसाहेब यांनी समाजासाठी केलेल्या कार्याचा आदर्श डोळ्यासमोर ठेवून समाजोपयोगी उपक्रम राबविण्याचा संकल्प यावेळी उपस्थित मान्यवरांनी व्यक्त केला. शिबिरामध्ये नजीकच्या शासकीय रुग्णालयाच्या रक्तपेढीचे सहकार्य लाभले. वैद्यकीय तपासणी करून पात्र रक्तदात्यांकडून सुरक्षित पद्धतीने रक्तसंकलन करण्यात आले.
रक्तदानाचे महत्त्व पटवून देण्यासाठी माहिती फलक लावण्यात आले होते तसेच रक्तदानाबाबत मार्गदर्शन सत्राचे आयोजन करण्यात आले. रक्तदान हे श्रेष्ठ दान असून, एका रक्तदात्यामुळे अनेक गरजू रुग्णांचे प्राण वाचू शकतात, असे मत वैद्यकीय अधिकाऱ्यांनी व्यक्त केले.
या शिबिराच्या यशस्वी आयोजनासाठी ग्रामपंचायत तलोशी, जनकल्याण रक्त केंद्र महाड, मुख्यमंत्री समृद्ध पंचायतराज अभियान अंतर्गत अधिकारी-कर्मचारी तसेच स्वयंसेवकांनी विशेष परिश्रम घेतले. रक्तदात्यांना प्रमाणपत्र व अल्पोपहार देऊन त्यांचे आभार मानण्यात आले. सामाजिक जबाबदारीची जाणीव करून देणारा हा उपक्रम ग्रामस्थांमध्ये विशेष कौतुकाचा विषय ठरला.