माणगाव शिवसत्ता टाइम्स (नरेश पाटील):-
दक्षिण रायगड जिल्ह्यात गुणवत्तापूर्ण व आधुनिक शिक्षणाचा विश्वासार्ह मानदंड म्हणून ओळख निर्माण करणाऱ्या ‘लीड स्कूल’ माणगाव येथे शैक्षणिक वर्ष २०२५–२६ चे वार्षिक स्नेहसंमेलन अत्यंत उत्साहात, शिस्तबद्ध आणि दिमाखदार वातावरणात पार पडले. दोन दिवस चाललेल्या या सोहळ्याच्या दुसऱ्या दिवशी विद्यार्थ्यांनी सादर केलेल्या सांस्कृतिक, कलात्मक आणि वैचारिक कार्यक्रमांनी उपस्थितांची मने जिंकून घेतली आणि शाळेच्या जागतिक दर्जाच्या शिक्षणदृष्टीकोनाचा प्रभावी प्रत्यय दिला.
कार्यक्रमाची सुरुवात प्रमुख पाहुण्यांच्या स्वागताने झाली. शाळेच्या प्राचार्य कार्यालयातून वाजत-गाजत प्रमुख पाहुण्यांना मुख्य मंचापर्यंत आणण्यात आले. स्वागत कक्षात पारंपरिक पद्धतीने टिळक समारंभ पार पडला. दीपप्रज्ज्वलन व मान्यवरांच्या सत्काराने कार्यक्रमाचे औपचारिक उद्घाटन झाले.
यावर्षीच्या स्नेहसंमेलनाची संकल्पना अत्यंत अभ्यासपूर्ण असून ती सादरीकरणातून प्रभावीपणे मांडण्यात आली. कार्यक्रमाची सांस्कृतिक सुरुवात मनमोहक भरतनाट्यम स्वागत गीताने झाली. ‘अवतार ॲक्ट’, ‘नमामि नमामि’ या गीतांवरील नृत्यप्रकारांनी मंचावर चैतन्य निर्माण केले, तर ‘महिषासुर मर्दिनी’च्या सशक्त अभिनयाने उपस्थित अक्षरशः स्तिमित झाले.
शाळेचे उपाध्यक्ष नितीन जिंदाल यांनी आपल्या भाषणातून विद्यार्थ्यांच्या कलागुणांचे, शिस्तीचे आणि आत्मविश्वासाचे विशेष कौतुक केले. त्यांनी शाळेच्या शैक्षणिक वाटचालीचा आढावा घेत ‘लीड स्कूल’ ही केवळ शाळा नसून विद्यार्थ्यांच्या उज्ज्वल भविष्यासाठी घडवलेली एक सशक्त शैक्षणिक व्यवस्था असल्याचे नमूद केले. यानंतर ‘झुलवा पाळणा’ हे सुश्राव्य गायन, शाळेचा वार्षिक अहवाल सादरीकरण तसेच विशेष नैपुण्य प्राप्त विद्यार्थ्यांचा मान्यवरांच्या हस्ते गौरव करण्यात आला. प्रमुख पाहुण्यांनी विद्यार्थ्यांना स्पर्धात्मक युगात यशस्वी होण्यासाठी मार्गदर्शन केले.
कार्यक्रमाच्या उत्तरार्धात पंजाबी गाणी, रेट्रो डान्स आणि ‘जोकर ॲक्ट’ने प्रेक्षकांचे भरपूर मनोरंजन केले. ‘ये तो सच है की भगवान है’ या गीताने भावनिक वातावरण निर्माण केले, तर ‘शेतकरी ॲक्ट’ आणि ‘पोतराज’ सादरीकरणातून सामाजिक जाणीव आणि लोककलेचा प्रभावी संगम घडवण्यात आला.
कार्यक्रमाच्या शेवटच्या टप्प्यात ‘नरसिंह ॲक्ट’, तबला व हार्मोनिअमवरील सुमधुर वाद्यसंगीत तसेच ‘पद्मावती’ आणि ‘छावा’ या ऐतिहासिक नाटिकांनी कार्यक्रमाची शोभा द्विगुणित केली. अखेरीस स्काऊट आणि गाईडच्या विद्यार्थ्यांनी जागतिक शांततेचा संदेश देत कार्यक्रमाची भावपूर्ण सांगता केली. विशेष उल्लेखनीय बाब म्हणजे, ‘लीड स्कूल माणगाव’ ही दक्षिण रायगडमधील अग्रगण्य शैक्षणिक संस्था म्हणून ओळखली जाते. गेल्या दशकाहून अधिक काळापासून कार्यरत असलेल्या या शाळेने गुणवत्तापूर्ण शिक्षण, शिस्तबद्ध वातावरण आणि नावीन्यपूर्ण अध्यापनपद्धतीमुळे स्वतःची ठाम ओळख निर्माण केली आहे. शाळेचा अभ्यासक्रम जागतिक दर्जाचा असून सखोल संशोधनातून तो अभ्यासपूर्वक तयार करून अंमलात आणण्यात आला आहे. या अभ्यासक्रमामुळे विद्यार्थ्यांमधील कौशल्य, सर्जनशीलता, नेतृत्वगुण आणि आत्मविश्वास यांचा सर्वांगीण विकास होत आहे.
शाळेचे प्राचार्य बसवराज जागाये यांच्या सक्षम, दूरदृष्टीपूर्ण आणि परिणामकारक नेतृत्वाखाली ‘लीड स्कूल माणगाव’ने उल्लेखनीय प्रगती साधली आहे. त्यांच्या कार्यकाळात शाळेची शैक्षणिक गुणवत्ता, शिस्त, व्यवस्थापन आणि विद्यार्थ्यांच्या सर्वांगीण विकासावर ठोस भर देण्यात आला असून त्याचा सकारात्मक परिणाम आज शाळेला मिळणाऱ्या उत्तम लौकिकातून स्पष्टपणे दिसून येतो. शाळेत सध्या असलेली मोठी विद्यार्थीसंख्या ही पालकांमध्ये ‘लीड स्कूल’बाबत असलेल्या प्रचंड विश्वासाचे प्रतीक असून आपल्या पाल्यांसाठी येथे प्रवेश मिळावा, अशी वाढती इच्छा समाजात दिसून येत आहे. वाढती विद्यार्थीसंख्या ही शाळेच्या गुणवत्तेची आणि सक्षम नेतृत्वाची ठोस साक्ष मानली जात आहे.
ग्रामीण भागातून येणाऱ्या विद्यार्थ्यांना संधीचे समान व्यासपीठ उपलब्ध करून देत ‘लीड स्कूल’ने विविध शैक्षणिक, स्पर्धात्मक आणि सहशैक्षणिक उपक्रम प्रभावीपणे राबविले आहेत. अलीकडेच शाळेने शैक्षणिक निकालांमध्ये उल्लेखनीय यश संपादन करून एक नवा बेंचमार्क प्रस्थापित केला आहे. शिक्षण, संस्कार, संस्कृती, क्रीडा आणि व्यक्तिमत्त्व विकास या सर्व अंगांनी विद्यार्थ्यांच्या सर्वांगीण घडणीसाठी शाळा सातत्याने प्रयत्नशील आहे.
या भव्य स्नेहसंमेलनास पालक, शिक्षक, ग्रामस्थ आणि शिक्षणप्रेमी नागरिक मोठ्या संख्येने उपस्थित होते. विद्यार्थ्यांनी सादर केलेली शिस्त, आत्मविश्वास आणि बहुआयामी प्रतिभा पाहता ‘लीड स्कूल माणगाव’ हे केवळ एक शैक्षणिक संस्थान नसून उद्याच्या सक्षम, सुसंस्कृत आणि आत्मनिर्भर पिढीची घडण करणारे प्रेरणादायी केंद्र असल्याची भावना सर्वत्र व्यक्त होत आहे.