पेण शिवसत्ता टाइम्स (देवा पेरवी):
डोलवी येथील पोलीस पाटील असलेल्या रमेश पाटील या ६२ वर्षीय लिंगपिसाटाने १४ वर्षीय बालिकेवर वारंवार अत्याचार केल्याने माणुसकीला काळीमा फासणारी घटना घडल्याने पेण तालुक्यात खळबळ माजली होती. या घटनेचा गुन्हा वडखळ पोलिस ठाण्यात दाखल करण्यात आला असला तरी अद्याप पर्यंत हा पोलीस पाटील फरार असल्याचे समजून येत आहे…तर वडखळ पोलीस आरोपीचा शोध घेत असून पोलिसांनी अद्याप फरार असलेला पोलीस पाटील रमेश पाटील हा मिळून आलेला नसल्याने याबाबत पेण तालुक्यात उलट सुलट चर्चेला उधाण आले आहे. तसेच आरोपीला सहकार्य करणाऱ्या त्याच्या मुलाला कोर्टात हजर केले असता त्याची रवानगी न्यायालयीन कोठडीत करण्यात आली आहे.
डोलवी येथील आरोपी रमेश अबांजी पाटील यांनी आपल्याच मित्राला फसवून आणि मैत्रीचा व ओळखीचा गैरफायदा घेवून फिर्यादी यांच्या १४ वर्षीय पिडीत मुलीबरोबर अश्लील चाळे व स्पर्श करून तिचे वडिलांना मारण्याची धमकी देवून तिच्या बरोबर बोरी, कार्ला व लोणावळा या ठिकाणी नेऊन वारंवार लैगिक अत्याचार केले होते. या संतापजनक घटनेचा वडखळ पोलिस ठाण्यात बालकांचे लैगिंक अत्याचारापासुन संरक्षण या कायदया प्रमाणे गुन्हा दाखल करण्यात आला आहे. परंतु या घटनेची तक्रार वडखळ पोलीस ठाण्यात करण्यात आल्यानंतर डोलवी येथील पोलीस पाटील असलेला रमेश पाटील हा फरार झाला असल्याने त्याला अटक करण्याकामी पोलिसांच्या नाकीनऊ आले आहे. या गुन्ह्याचा अधिक तपास पोलिस निरीक्षक प्रसाद पांढरे यांच्या मार्गदर्शनाखाली वडखळ पोलीस करत आहेत…या घटनेत वडखळ पोलिसांनी सखोल तपास करताना आरोपी (वडील) रमेश पाटील यांना सहकार्य केल्याने (मुलगा) नंदकुमार रमेश पाटील याला पोलिसांनी अटक केली असून त्याला न्यायालयात हजर केले असता त्याची अलिबाग येथील न्यायालयीन कोठडीत रवानगी करण्यात आली आहे. तर आरोपीला कोणत्याही प्रकारे सहकार्य करून नये असे आवाहन पोलीस विभागाकडून करण्यात आले आहे.
