माणगाव शिवसत्ता टाइम्स (नरेश पाटील):-
रायगड जिल्हा पोलिसांनी यंदाच्या गणेशोत्सव काळात दाखविलेली शिस्त,तत्परता आणि नागरिकाभिमुख कार्यपद्धती ही खरोखरच कौतुकास्पद ठरली..मुंबई–गोवा महामार्ग (एन.एच.–६६) सारख्या महत्वाच्या मार्गावर लाखो भाविकांचा ओघ असूनही वाहतुकीचा सुरळीत प्रवाह राखण्यात त्यांनी ऐतिहासिक कामगिरी केली.
यंदाच्या गणेशोत्सवात मुंबई–गोवा राष्ट्रीय महामार्ग (एन.एच.–६६) वर एकही मोठी वाहतूक कोंडी, अपघात वा अन्य अप्रिय प्रकार घडला नाही. शुक्रवार, २१ ऑगस्टच्या रात्रीपासून बुधवार, २७ ऑगस्ट २०२५ पर्यंत वाहनांचा प्रवास अखंड सुरू राहिला आणि सुरळीत वाहतुकीचे नवे उदाहरण घडले. २२, २३ व २४ ऑगस्टच्या रात्री भाविकांच्या वाहनांची सर्वाधिक गर्दी दिसून आली. त्यानंतर २५ व २६ ऑगस्टला रात्रंदिवस रस्त्यावरून वाहनांचा ओघ वाढत गेला. अगदी गणेश चतुर्थीच्या दिवशी (२७ ऑगस्ट) दुपारपर्यंत वाहनांची मोठी गर्दी सुरू होती. तरीदेखील या काळात कुठेही वाहतूक खोळंबा न होता अखंड प्रवाह सुरू राहिला. या यशाचे श्रेय पोलीस विभाग, राष्ट्रीय महामार्ग प्राधिकरण (NHAI), सार्वजनिक बांधकाम विभाग, वाहतूक शाखा आणि प्रशासन यांना जाते. सूक्ष्म नियोजन करून सर्व यंत्रणांनी केलेले हे ऐतिहासिक समन्वयाचे काम ठरले. याबाबत प्रसिद्ध समाजसेवक व ज्येष्ठ नागरिक संजय अण्णा साबळे यांनी समाधान व्यक्त करताना सांगितले की, संबंधित सर्व यंत्रणांनी केलेले व्यवस्थापन कौतुकास्पद आहे. फेरीबोट सेवा, ‘रो-रो’ गाड्या, अतिरिक्त रेल्वेगाड्या, तसेच एन.एच.–६६ ला जोडणारे अंतर्गत रस्ते वापरणे यांसारख्या उपाययोजना केल्यामुळे वाहतुकीत मोठी गती मिळाली. घाटमाथ्यावरील रस्त्यांवरही उत्कृष्ट नियोजन झाल्याने मुंबई–गोवा महामार्गावर अखंड प्रवाह सुरू राहिला. दरम्यान, माणगाव पोलीस ठाण्याचे पोलीस निरीक्षक निवृत्ती बोहाडे यांनी आमच्या प्रतिनिधीशी बोलताना सांगितले की, “यंदा रायगड जिल्ह्याच्या पोलीस अधीक्षक मा. आँचल दलाल मॅडम यांचे विशेष सहकार्य, NHAI प्राधिकरण, वाहतूक आयुक्तालय व स्थानिक प्रशासनाच्या टीमवर्कमुळे हे यश शक्य झाले. सामूहिक प्रयत्नांमुळेच वाहतूक इतक्या सुरळीत पार पडली.
आमच्या प्रतिनिधीने वाहतुकीतून प्रवास करणाऱ्या भाविकांकडून प्रतिक्रिया घेण्याचा प्रयत्न केला, मात्र एकही अडकलेले वाहन न सापडल्याने ते शक्य झाले नाही. त्याऐवजी माणगाव बाजारपेठेत जाऊन विविध दुकानदार, फेरीवाले व नागरिकांची मते जाणून घेतली. एका पान टपरीवाल्याने सांगितले की, वाहनांचा सतत प्रवाह दिसत होता, कोणतीही कोंडी झाली नाही. एका फळ विक्रेत्याने नमूद केले की, रस्ते मोकळे असल्याने भाविक थांबता थांबता आपल्या गावी निघून गेले. एका छोट्या हॉटेलधारकाने सांगितले की, काही मीटरांवरच वारंवार तैनात असलेल्या स्वयंसेवक व ट्रॅफिक मार्शल्सनी वाहनांना थांबू दिले नाही; शिट्ट्या वाजवून सर्वांना पुढे चालू ठेवले. एका ऑटो चालकाने सांगितले की, आमचा धंदा नेहमीप्रमाणे सुरू राहिला व वाहतूक कोंडी अजिबात जाणवली नाही. एका मिठाई विक्रेत्याने सांगितले की, आमचे ग्राहक स्थानिक असल्याने धंदा चांगला झाला. एका बूट दुकानधारकाने सांगितले की, कपड्यांबरोबरच पादत्राण्यांचीही खरेदी झाली; मात्र वाहतुकीचा आमच्या धंद्यावर परिणाम झाला नाही. एका इलेक्ट्रॉनिक्स दुकानधारकाने सांगितले की, माझे दुकान महामार्गालगत असूनही रस्त्यावर कधीही अडथळा निर्माण झाला नाही. वाहतूक पोलीस व प्रशासनाने उत्तम काम केले. एक युवक आमच्या प्रतिनिधीकडे लक्ष वेधून म्हणाला की, यंदा उलट चित्र दिसले – एकीकडे कोकणाकडे जाणाऱ्या वाहनांची सततची गर्दी होती, तर दुसऱ्या बाजूला मुंबईकडे जाणाऱ्या मार्गावर परतीची वाहने दाटीवाटीने होती आणि अतिशय मंदगतीने पुढे सरकत होती. स्वतः वाहतूक पोलिसांनीही या उलट्या गर्दीची दखल घेतली व तीही सुयोग्यरीत्या हाताळली.
एकंदरीत, गणेशोत्सव २०२५ मध्ये मुंबई–गोवा महामार्गावरील वाहतूक व्यवस्थापन अत्यंत सुरळीत व कौतुकास्पद ठरले. स्थानिक नागरिक, व्यापारी व भाविक सर्वांकडून पोलीस विभाग व प्रशासनाला अभिनंदनाचा वर्षाव होत आहे. रायगड पोलिसांच्या तात्काळ निर्णयक्षमता, सतत रस्त्यावरची उपस्थिती व नागरिकहिताचे भान हे सर्वच घटक या यशामागे आहेत. खऱ्या अर्थाने “जनतेसाठी तत्पर, सुरक्षित प्रवासाची हमी” हे रायगड पोलीसांनी या गणेशोत्सवात सिद्ध करून दाखवले.