चौक शिवसत्ता टाइम्स (अर्जुन कदम) :-
तुपगांव (चौक) येथे ईद ए मिलाद ऊन नबी निमित्ताने उत्साहाच्या आणि आनंदी वातावरण निर्माण झाले आहे.इस्लामिक कॅलेंडरनुसार रबी-उल-अव्वलच्या १२ व्या तारखेला साजरा होणाऱ्या ईद-ए-मिलाद-उन-नबी निमित्त तुपगाव येथे उत्साहाचे वातावरण पाहायला मिळाले. पैगंबर मोहम्मद साहेबांच्या जयंतीनिमित्त मुस्लिम बांधवांनी तुपगाव येथे भव्य रॅली काढली, ज्यामध्ये मोठ्या संख्येने मुस्लिम बांधव, महिला व मुले सहभागी झाले होते.
ही रॅली जामा मशीद येथून सुरू होऊन संपूर्ण तुपगांव मोहल्ला फिरून पुन्हा जामा मशीद येथे आल्यावर खीर वाटपाचा कार्यक्रम करण्यात आला. या रॅलीमध्ये लहान मुलांपासून ते वयोवृद्धांपर्यंत सर्वच वयोगटांतील मुस्लिम बांधवांचा सहभाग होता. शिस्तबद्ध पद्धतीने आणि शांत मार्गाने ही रॅली पार पडली. यावेळी संपूर्ण रॅली मार्गावर शांतता आणि एकोपा कायम ठेवण्यात आला, ज्यामुळे या धार्मिक उत्सवाचा आनंद द्विगुणीत झाला.
ईद-ए-मिलाद-उन-नबी हा सण मुस्लिम समुदायात अत्यंत महत्त्वाचा मानला जातो. त्याला मिलाद किंवा १२ वफत असेही म्हणतात. पैगंबर मोहम्मद साहेबांचा जन्म आणि त्यांच्या जीवनकार्याचा गौरव करण्यासाठी हा दिवस साजरा केला जातो. या दिवशी मुस्लिम बांधव त्यांच्या शिकवणी आणि आदर्श जीवनाचे स्मरण करतात, तसेच त्यांच्या मार्गावर चालण्याची प्रतिज्ञा घेतात.या उत्सवाचे मोठे धार्मिक आणि सांस्कृतिक महत्त्व आहे. प्रेम, एकता आणि आध्यात्मिक जागृतीचे प्रतीक मानला जाणारा हा दिवस जगभरातील मुस्लिमांना एकत्र आणतो. असा हा पवित्र सण असल्याचे यासिन भालदार यांनी सांगितले.तुपगांव येथील भव्य रॅलीतूनही हाच संदेश दिसून आला. शांततापूर्ण आणि शिस्तबद्ध पद्धतीने काढलेल्या या रॅलीचे नागरिकांनी कौतुक केले.यावेळी अनेकांनी रॅलीत मिठाई व अन्य खाऊचे वाटप करण्यात आले.या निमित्ताने एकतेची भावना निर्माण झाली आहे. यावेळी हिंदू बांधवांनी देखील शुभेच्छा दिल्या. चौक प्रभारी विशाल पवार व त्यांचे सहकारी उपस्थित होते.