महाड शिवसत्ता टाइम्स (रेश्मा माने):-
महाड शहरातील पेशवाई या दुग्धजन्य पदार्थांच्या दुकानात रविवारी उशिरा रात्री लागलेल्या आगीत तरुण व्यावसायिक नागेश भोसले यांचे मोठे आर्थिक नुकसान झाले. या घटनेची माहिती मिळताच नामदार भरतशेठ गोगावले यांनी मंगळवारी घटनास्थळी भेट देऊन प्रत्यक्ष पाहणी केली. परिस्थितीची गंभीरता ओळखून त्यांनी तातडीची आर्थिक मदत या व्यापारी कुटुंबाला हस्तांतरित केली. रविवारी मध्यरात्रीच्या सुमारास अचानक लागलेल्या आगीत दुकानातील चार फ्रीज, दुग्धजन्य पदार्थ तसेच इतर सर्व साहित्य जळून खाक झाले.अग्निशमन दलाच्या तातडीच्या आणि अचूक हस्तक्षेपामुळे आगीवर नियंत्रण मिळाले, तरीही लाखोंचे नुकसान सहन करावे लागल्याने व्यापारी आर्थिकदृष्ट्या कोलमडला होता. नामदार गोगावलेंकडून मिळालेल्या मदतीमुळे नागेश भोसले यांनी समाधान व्यक्त करत मनःपूर्वक आभार मानले. तसेच पुढील शासकीय कार्यवाही दरम्यान सर्वतोपरी सहकार्य करण्याचे आश्वासन गोगावले यांनी यावेळी दिले.