माणगाव शिवसत्ता टाइम्स (दिपक दपके):-
मुंबई-गोवा महामार्गावर आज, २६ नोव्हेंबर रोजी सकाळी सात वाजण्याच्या सुमारास शिवशाही बस आणि टेम्पो ट्रक यांच्यात झालेल्या भीषण अपघातात सहा प्रवासी जखमी झाले आहेत.मिळालेल्या माहितीनुसार, मुंबईकडून मालवणकडे जाणारी शिवशाही बस महाडच्या दिशेने जात होती. त्याचवेळी समोरून येणाऱ्या एका टेम्पो ट्रकला तिने जोरदार धडक दिली. या धडकेमुळे अपघात झाला.अपघातातील जखमी प्रवाशांना तात्काळ माणगाव उपजिल्हा रुग्णालयात उपचारासाठी दाखल करण्यात आले.अपघाताची माहिती मिळताच महाड महामार्ग पोलीस आणि महाड एमआयडीसी मार्ग टीम घटनास्थळी दाखल झाली.यावेळी केवा कंपनीचे विकास सासने आणि आपटे ऑरगॅनिक कंपनीचे रोहन तांबे यांनी प्रवाशांना मदत केली. एसआरव्ही रेस्क्यू टीमचे इमरान ढवळांकर यांनी घटनास्थळी क्रेनच्या मदतीने दोन्ही वाहने बाजूला केली आणि महामार्गावरील वाहतूक पुन्हा सुरळीत केली. सुदैवाने, या अपघातात कोणतीही जीवितहानी झाली नाही, मात्र प्रवाशांचे मोठे नुकसान झाले आहे.