रायगड शिवसत्ता टाइम्स (वार्ताहर):-
गेली ३० वर्षे अलिबाग नगरपालिकेवर शेतकरी कामगार पक्षाचा जो ‘दबदबा’ होता, तो आता इतिहास जमा होण्याची चिन्हे दिसत आहेत… २०२५ च्या या रणधुमाळीत भाजपने आपले सर्व बळ पणाला लावले असून,थेट नगराध्यक्ष पदासाठी मैदानात उतरलेली भाजपची तडफदार उमेदवार तनुजा पेरेकर अलिबागच्या राजकारणाचा नवा चेहरा बनणार यात शंका नाही… यावेळी निवडणूक नुसती लढवली जात नाहीये, तर ती भाजपने आपल्या प्रतिष्ठेची केली आहे. एकूण २० पैकी तब्बल १५ प्रभागात भाजपचे उमेदवार तुफान तयारीने उतरले आहेत. फक्त ५ जागा शिंदे गटासाठी सोडल्या,पण मैदानात उतरलेले भाजपचे उमेदवार ‘एकच लक्ष्य’ घेऊन निघाले आहेत.अलिबागवर भाजपचा झेंडा फडकवायचा…भाजपची ही वाढती सक्रियता आणि ‘महायुती’ची बांधणी पाहून, वर्षानुवर्षे सत्ता उपभोगणाऱ्या शेकापच्या गटात मोठी अस्वस्थता पसरली आहे.
प्रभाग क्रमांक २ब मध्ये झालेला ‘खेळ’ तर थेट राजकीय सूत्रांनाच आव्हान देणारा आहे. भाजपच्या संतोष साळुंखे यांनी ऐनवेळी उमेदवारी मागे घेतली आणि माजी नगराध्यक्ष प्रशांत नाईक यांना ‘बिनविरोध’ विजयी होण्याची संधी मिळाली. हा ‘शिंदे गटाचा अप्रत्यक्ष हस्तक्षेप’ आहे की भाजप-शेकाप यांच्यातील ‘समझोता’, यावर शहरातील प्रत्येक चौकात चर्चा रंगली आहे. पण भाजपच्या कार्यकर्त्यांनी हे स्पष्ट केले आहे की, नगराध्यक्ष पदाच्या लढाईत कोणतीही तडजोड नाही!
या निवडणुकीत स्थानिक आमदार महेंद्र दळवी आणि माजी नगराध्यक्ष प्रशांत नाईक यांच्या घराण्याचे राजकारण अत्यंत महत्त्वाचे ठरले आहे.भाजप युतीसाठी आमदार महेंद्र दळवी यांच्या पत्नी मानसी दळवी जोर लावत आहेत, तर त्यांचीच मुलगी अदिती दळवी शेकापच्या अक्षया नाईक यांच्यासाठी प्रचार करत आहेत! हे पक्षांच्या सीमा ओलांडणारे कौटुंबिक राजकारण मतदारांना संभ्रमात टाकत असले तरी, यातून एक गोष्ट स्पष्ट होते: भाजपचा वाढता प्रभाव रोखण्यासाठी शेकापला आता ‘नात्यांचे’ आधार घ्यावे लागत आहेत!
एक गोष्ट स्पष्ट आहे…अलिबागच्या मतदारांना आता ‘बदल’ हवा आहे.३० वर्षांची सत्ता असूनही शहरात झालेले काम आणि विकास याची तुलना करताना, भाजपने ‘नवा अलिबागचे व्हिजन मतदारांसमोर ठेवले आहे. या निवडणुकीत भाजपचा विजय निश्चित आहे.तनुजा पेरेकर केवळ उमेदवार नाहीत, त्या अलिबागच्या भविष्याचे प्रतिनिधित्व करतात.आता वेळ आली आहे, ‘शेकापच्या जुन्या आणि शिळ्या राजकारणाला कायमचा रामराम ठोकण्याची!