उरण शिवसत्ता टाइम्स (वार्ताहर):-
उरण नगर परिषद निवडणुकीत आज मतदानाच्या दिवशी निवडणूक आयोगाच्या कार्यक्षमतेवरच प्रश्नचिन्ह निर्माण करणारा अत्यंत गंभीर आणि धक्कादायक प्रकार उघडकीस आला आहे.निवडणूक निर्णय अधिकारी वर्गाने सातत्याने आक्षेप घेऊनही त्याकडे पूर्णपणे कानाडोळा केला असल्याचा गंभीर आरोप होत असतानाच,१० नंबर प्रभागातील एका २१ वर्षीय युवतीच्या नावाने,ती मतदान केंद्रात पोहोचण्यापूर्वीच,कोणीतरी बोगस मतदान करून गेल्याची सनसनाटी घटना समोर आली आहे.
नेहा मनोहर ठाकूर ही उच्च शिक्षित मतदार आज सकाळी दहा वाजताच्या सुमारास एन.आय. हायस्कूल येथील मतदान केंद्रावर मतदान करण्यासाठी गेली होती. रांगेत उभी राहून ती जेव्हा प्रत्यक्ष मतदान केंद्रात मतदान करण्यासाठी ज्या क्रमांकावर तिचे नाव होते, तिथे पोहोचली, तेव्हा तिला धक्कादायक माहिती मिळाली.तिच्या नावावरील मतदान यापूर्वीच होऊन गेल्याचे सांगण्यात आले.
या प्रकारानंतर नेहा ठाकूरने मतदान केंद्रात आकांडतांडव (धिंगाणा) करत आपली भूमिका ठामपणे मांडली. शेवटी, निवडणूक निर्णय अधिकारी वर्गाने एक बैठक घेऊन त्या तरुणीला बॅलेट पेपरवर मतदान करण्याची परवानगी दिली.सर्वात महत्त्वाचा आणि गंभीर प्रश्न हा आहे की, नेहा ठाकूरच्या नावाने मतदान करून गेलेली ती अन्य तरुणी नक्की कोण होती? या गंभीर गैरप्रकाराबाबत मुख्य निवडणूक अधिकारी तथा उरणचे तहसीलदार उद्धव कदम यांना विचारले असता, त्यांनी मात्र यावर काहीही बोलण्यास नकार दिला आणि कोणतीही प्रतिक्रिया दिलेली नाही.
उरण नगर परिषद निवडणूक यापूर्वीच वादग्रस्त ठरली आहे. पाच हजारपेक्षा जास्त बोगस मतदार असल्याचा आरोप यापूर्वीच झाला होता. त्याचबरोबर, निवडणुकीला अवघे दोन दिवस बाकी असताना एका प्रभागात भाजपाच्या उमेदवाराने थेट मतदान केंद्रात मीटिंग घेतल्याची सनसनाटी घटना देखील घडली होती.आज थेट दुसऱ्याच्या नावावर मतदान झाल्याचे प्रकरण समोर आल्यानंतर, आणि प्रशासनाकडून केवळ ‘तोंडावर बोट’ ठेवून मौन पाळले जात असल्याने, निवडणूक यंत्रणा पूर्णतः कोणाच्या तरी इशाऱ्यावर काम करत आहे की काय? प्रशासन नेमके कोणाच्या दबावाखाली तर नाही ना? असा गंभीर सवाल यानिमित्ताने विचारला जात आहे. प्रशासनाच्या या भूमिकेमुळे उरणच्या निवडणुकीतील ‘हमरीतुमती’चे वातावरण आणखी तापले आहे.