उरण शिवसत्ता टाइम्स (प्रवीण पाटील) :-
उरण तालुक्यातील खोपटे पाटीलपाडा येथील ग्रामस्थांच्या सहकार्याने १९४१ साली शिवकृपा गौरा मंडळाची स्थापना केली. पूर्वी एका जुन्या घरात या शिवकृपा गौऱ्याची स्थापना केली जात होती. कालांतराने त्या घरमालकाने हे घर या शिवकृपा गौरा मंडळासाठी दिले. त्यानंतर ग्रामस्थांच्या सहकार्याने शिवमंदिर उभारण्यात आले. तेव्हापासून या मंदिरात शिवकृपा गौऱ्याची प्रतिष्ठापना केली जात आहे. दरवर्षी मोठ्या भक्तिभावाने हा सण गावकरी साजरा करत असून शिवकृपा गौरा मंडळाच्यावतीने विविध सामाजिक, सांस्कृतिक उपक्रम राबविले जात आहेत…
सलग पाच दिवस उत्सव साजरा करण्याची परंपरा मागील ८३ वर्षांपासून शिवकृपा मंडळाने जपली आहे…शिवकृपा गौरा उत्सवाला बुधवार दिनांक.११ सप्टेंबर पासून प्रारंभ झाला आहे. उरण तालुक्यातील खोपटा येथील शिवकृपा गौरा उत्सवाच्या पाच दिवस सांस्कृतिक कार्यक्रम, भजन,किर्तन, गोंधळ, महिला पुरूषांचे पारंपारिक नृत्य, आरोग्य शिबीर तसेच बाळ्या नाच या सारखे मनोरंजनाच्या विविध कार्यक्रमांची रेलचेल असते. शुक्रवारी दिनांक १३ सप्टेंबर रोजी शिव कुपा गौरा मंडळाच्यावतीने आरोग्य व नेत्र तपासणी शिबिराचे आयोजन करण्यात आले होते.या शिबिराला ग्रामीण भागातील अबालवृद्धानी विशेष करून महिलांनी उत्स्फूर्तपणे प्रतिसाद दर्शविला होता…
यावर्षी मंडळाच्या वतीने शुक्रवारी दिनांक १३ सप्टेंबर रोजी आर झुनझुनवाला शंकरा आय हॉस्पिटल यांच्या विद्यमानाने मोफत डोळ्यांची तपासणी व आरोग्य शिबिराचे आयोजन करण्यात आले होते.यावेळी खोपटा गावातील व परिसरातील अबालवृद्ध विशेष करून महिलानी शिबिरात सहभाग घेऊन आपल्या डोक्याची व आरोग्याची तपासणी करून घेतली. यावर्षी शिव कुमार गौरा मंडळाचे ८३ वे वर्ष सुरू असून. मंडळाच्या माध्यमातून अनेक सांस्कृतिक कार्यक्रम, विद्यार्थ्यांचे गुणगौरव, चित्रकला स्पर्धेचे आयोजन तसेच ज्येष्ठ नागरिकांचा सत्कार असे सामाजिक उपक्रम राबवले जात असल्याची माहिती मंडळाचे सेक्रेटरी ॲड. सत्यवान भगत यांनी दिली.
