अलिबाग शिवसत्ता टाइम्स (अमूलकुमार जैन):-
रायगड जिल्ह्यात भावे, भावे बौद्ध वाडी येथील केलेल्या सभागृहाचे देयक काढण्यासाठी दहा हजार रुपयांची लाच घेणारा रायगड जिल्हा परिषदेचा, श्रीवर्धन येथील उपअभियंता डॉ.प्रवीण पंढरीनाथ मोरे, वर्ग १, बांधकाम विभाग रायगड जिल्हा परिषद उपविभाग श्रीवर्धन, यास रायगड लाचलुचपत प्रतिबंधक विभागाने श्रीवर्धन येथून ताब्यात घेतले आहे. आरोपी उपअभियंता डॉ.प्रवीण पंढरीनाथ मोरे हा मूळचा, प्लॉट नंबर १८/बी श्री हरिनगर नंबर ०२ मानेवाड बेसा रोड नागपूर येथील असून,सध्या तो लोहार यांचे घर, श्रीवर्धन पोलीस स्टेशनच्या बाजूला,मेजवानी हॉटेल जवळ,श्रीवर्धन जि.रायगड येथे वास्तव्यास आहे.लाच लुचपत प्रतिबंधक विभाग यांच्याकडून मिळालेली माहिती अशी की,तक्रारदार हे ठेकेदार असून त्यांना श्रीवर्धन तालुक्यातील भावे बौद्ध वाडी, याठिकाणी रायगड जिल्हा परिषदेच्या समाज कल्याण विभागांतर्गत सभागृहाच्या बांधकामाचे ७,००,०००/-रुपयाचे कंत्राट २०२३-२४ या कालावधीत देण्यात आले होते. सदर काम पूर्ण झाल्यानंतर तक्रारदार यांना समाजकल्याण अलिबाग खात्याकडून १,४०,०००/- रुपयांचे देयक अदा करण्यात आले होते. सदर मंजूर झालेल्या देयकाची टक्केवारी म्हणून २५००/ रुपये व उर्वरित राहिलेले रुपये ५,६०,०००/- हे देयक कार्यकारी अभियंता रायगड जिल्हा परिषद अलिबाग येथे पाठविण्याच्या मोबदल्यात व मंजूर करण्यास मदत करण्यासाठी १०,५००/- रूपये अशी एकूण रक्कम रुपये १३,०००/- रकमेच्या लाचेची मागणी करीत असलेबाबत तक्रार लाच लुचपत प्रतिबंधक विभागास दिनांक २२/०१/२५ रोजी प्राप्त झाली होती.
मिळालेल्या तक्रारीच्या अनुषंगाने दि.२३/०१/२५ रोजी करण्यात आलेल्या पडताळणी दरम्यान आरोपी लोकसेवक याने तक्रारदार यांच्याकडे रुपये १३,०००/- लाचेची रक्कम मागणी करून पहिला हप्ता १०,०००/- रुपये लाचेची मागणी करून स्वीकारण्याचे मान्य केल्याचे निष्पन्न झाले. त्यानुसार दि.२३/०१/२५ रोजी करण्यात आलेल्या सापळा कारवाई दरम्यान, आरोपी लोकसेवक यांनी तक्रारदार यांचेकडून मागणी केलेली लाचेची रक्कम रुपये १०,०००/- पंच साक्षीदार यांच्या समक्ष, तक्रारदार यांचेकडून स्वीकारली असता त्यांना लाच स्वीकारताना रंगेहात पकडून ताब्यात घेण्यात आले आहे. सदर कारवाई ही लाच लुचपत प्रतिबंधक विभाग ठाणे परिक्षेत्र अधीक्षक शिवराज पाटील, अपर पोलीस अधीक्षक, प्रतिबंधक विभाग, ठाणे परिक्षेत्र, ठाणे संजय गोवीलकर ,सुहास शिंदे यांच्या मार्गदर्शनाखाली पोलीस उप अधीक्षक शशिकांत पाडावे, पोलीस निरीक्षक निशांत धनवडे, संतोष भिसे,सहाय्यक फौजदार विनोद जाधव , पोलीस हवालदार सचिन आटपाडकर,पोलिस हवालदार महेश पाटील, पोलिस नाईक सचिन आटपाडकर, चालक पोलिस हवालदार सागर पाटील यांच्या पथकाने केली आहे.