मुंबई शिवसत्ता टाइम्स (धनंजय कवठेकर):-
विधानसभा निवडणुकीनंतर कोकणातील रायगड जिल्ह्यात शेतकरी कामगार पक्षाला मोठा धक्का बसलाय…कोकणात पुन्हा एकदा मोठा राजकीय भूकंप झाला आहे. शेकापच्या बालेकिल्ल्याला भाजपाने सुरुंग लावण्याची तयारी केली आहे…रायगडमधील शेकापचे माजी आमदार पंडितशेठ पाटील यांनी अखेर आज १६ एप्रिलला भाजपमध्ये पक्षप्रवेश केलाय… शेतकरी कामगार पक्षाचे सरचिटणीस माजी आमदार जयंत पाटील यांचे भाऊ माजी आमदार सुभाष तथा पंडितशेठ पाटील आणि भाचे व माजी मंत्री शेकापच्या ज्येष्ठ नेत्या मिनाक्षी पाटील यांचे चिरंजीव अॅड. आस्वाद पाटील,चित्रा पाटील यांनी आज शेतकरी कामगार पक्षाला अखेरचा लाल सलाम केला. त्यांनी मुंबईत झालेल्या कार्यक्रमात भाजपमध्ये प्रवेश केला.रायगड जिल्ह्यात शेकापसाठी हा मोठा राजकीय धक्का मानला जात आहे. माझ्या पक्ष प्रवेशामुळे रायगड जिल्ह्यात भाजप एक नंबरला येणार असल्याचा दावा माजी आमदार पंडित शेठ पाटील यांनी केला. रायगड जिल्ह्यात मला मानणारा मोठा वर्ग असून त्याचा भारतीय जनता पार्टीला मोठा फायदा होईल, शिवाय आगामी काळात होणाऱ्या स्थानिक स्वराज्य संस्थांचा निवडणुकीत पंडितशेठ पाटील काय आहे ते इतरांना कळेल, असा इशारा त्यांनी शेकाप नेत्यांना दिला.भाजपचे कार्यकारी अध्यक्ष माजी मंत्री रविंद्र चव्हाण यांच्या प्रमुख उपस्थितीत भाजप प्रदेश कार्यालयात माजी आमदार पंडीतशेठ पाटील आणि अॅड. आस्वाद पाटील यांनी आपल्या शेकडो कार्यकर्त्यांसह भाजपमध्ये प्रवेश केला. यावेळी माजी आमदार पंडीतशेठ पाटील यांच्या पत्नी भावना पाटील, खासदार धैर्यशिल पाटील, पनवेलचे आमदार प्रशांत ठाकूर, उरणचे आमदार महेश बालदी आणि शेकापचे विविध तालुक्यांतील प्रमुख पदाधिकारी व कार्यकर्ते उपस्थित होते…