रायगड शिवसत्ता टाइम्स (वार्ताहर):-
रायगड जिल्ह्यातील महत्त्वाच्या दहा नगरपरिषदांच्या निवडणुकीचा प्रचार आता अंतिम टप्प्यात आला असला तरी,या प्रचाराकडे राज्यातील स्टार प्रचारकांनी अक्षरशः पाठ फिरवली आहे. मुख्यमंत्री,उपमुख्यमंत्री किंवा प्रमुख पक्षांचे मोठे नेते जिल्ह्यात फिरकले नसल्यामुळे, सर्व प्रचाराची धुरा स्थानिक नेत्यांच्या खांद्यावर पडली आहे.जिल्ह्यात खोपोली,अलिबाग,महाड,रोहा,पेण अशा दहा पालिकांसाठी निवडणूक होत आहे.भाजप, शिवसेना (शिंदे), राष्ट्रवादी (अजित पवार) यांची ‘महायुती’ आणि महाविकास आघाडीचे उमेदवार रिंगणात आहेत. मात्र:मुख्यमंत्री देवेंद्र फडणवीस यांची पेण येथील नियोजित सभा रद्द झाली.उपमुख्यमंत्री एकनाथ शिंदे हे महाडमध्ये येणार होते, पण त्यांचाही दौरा अद्याप झालेला नाही.एखाद-दुसरा अपवाद वगळता,राज्यातील कोणताही मोठा नेता जिल्ह्याच्या प्रचारात फिरकलेला नाही.यामुळे, ‘महायुती’ असो वा ‘महाविकास आघाडी’, दोन्हीकडील बड्या नेत्यांनी रायगडच्या निवडणुकीला गांभीर्याने घेतले नसल्याचे चित्र आहे. स्टार प्रचारक फिरकले नसल्यामुळे, स्थानिक खासदार-आमदारांनाच सर्व दहा पालिकांचा प्रचार सांभाळावा लागत आहे. त्यामुळे त्यांना जिल्ह्याबाहेर जाणे शक्य होत नाहीये. जाहीर सभांपेक्षा उमेदवार घरोघरी आणि दारोदारी जाऊन मतदारांना भेटण्यावर अधिक भर देत आहेत.निवडणूक आयोगाने प्रचाराचा कालावधी एक दिवसाने वाढवला आहे. त्यामुळे आता अखेरचा दिवस (१ डिसेंबर) शिल्लक आहे. या दिवशी तरी राजकीय पक्ष वाहनांच्या मोठ्या रॅली काढून आपले शक्ती प्रदर्शन करतील, अशी अपेक्षा कार्यकर्ते व्यक्त करत आहेत. सध्या अनेक ठिकाणी सोयीनुसार युत्या-आघाड्या झाल्याने, काही पालिकांमध्ये घटक पक्ष एकमेकांविरोधात उभे ठाकले आहेत, ज्यामुळे प्रचाराची धार वाढत आहे. पण बड्या नेत्यांची अनुपस्थिती रायगडच्या राजकीय वर्तुळात चर्चेचा विषय ठरली आहे.