माणगाव शिवसत्ता टाइम्स (नरेश पाटील):-
रविवारी ३० नोव्हेंबर २०२५ रोजी दुपारी वाहन बिघाडामुळे शेलार नाक्यावर झालेल्या मोठ्या वाहतूक कोंडीने पुन्हा एकदा मुंबई–गोवा महामार्गावरील माणगाव विभागातील रस्त्यांची बिकट व असहाय्य स्थिती समोर आणली. वाहतुकीचा निचरा पूर्णपणे विस्कळीत होत असताना, दुचाकीस्वारांनी व्यक्त केलेल्या संतापातून नागरिकांचा त्रास किती तीव्र पातळीवर पोहोचला आहे, हे प्रकर्षाने दिसून आले.
मुंबई–गोवा महामार्गावरील माणगांव शहरातील शेलार नाका परिसरात एका वाहनाच्या अचानक बिघाडामुळे दुपारी सुमारे १२.४० वा. मोठी कोंडी निर्माण झाली. राष्ट्रीय महामार्ग क्र. ६६ अर्थात मुंबई–गोवा महामार्गावरील वाहतुकीची बिकट अवस्था पुन्हा समोर आली.
मुंबईकडे जाणाऱ्या मार्गावर तीन ते चार रांगा तयार झाल्या होत्या. शहरातून गेलेला हा रस्ता अरुंद असल्याने प्रत्येक लेनमध्ये फक्त दोन रांगांनीच वाहतूक अपेक्षित असताना, मुंबई दिशेने जाणाऱ्या लेनमध्ये तीन ते चार रांगा तयार झाल्या. त्यामुळे पादचाऱ्यांची हालचाल पूर्णतः विस्कळीत झाली, तर महाड दिशेकडे जाणाऱ्या वाहनांना अवघ्या एका अरुंद लेनमधून वाट काढावी लागली.
दरम्यान, वाहतूक पोलीसांची कमतरता भरून काढण्यासाठी ऑटोचालक पुन्हा एकदा पुढे सरसावले. सुमारे तीन ते चार ऑटोचालकांनीच स्वयंप्रेरणेने वाहतूक नियंत्रणाची जबाबदारी उचलली. काही अंतरावर उभे राहत त्यांनी दोन्ही दिशेची वाहतूक पाहत पर्यायी पद्धतीने वाहनांना मार्ग दिला. वाहतूक शिस्त राखण्यासाठी त्यांनी आपल्या जवळच्या मोठ्या शिट्ट्यांचा वापर केला. माणगावात वारंवार होणाऱ्या कोंड्यांची त्यांना जाणीव असल्याने, अशा प्रसंगी हे ऑटोचालक नेहमी मदतीला धावून येतात.
दररोजची कोंडी—नागरिक त्रस्त! मुंबई–गोवा महामार्गावरील माणगाव शहर हद्दीतील वाहतूक कोंडी आता अक्षरशः दररोजची समस्या बनली आहे. पूर्वी शनिवार–रविवार किंवा सुट्ट्यांच्या काळातच मोठ्या कोंड्या होत असत; मात्र आता रोजच भारी ते अतिभारी कोंडी होत असून ती उशिरापर्यंत सुरूच राहते.
याच पार्श्वभूमीवर, शनिवारी २९ नोव्हेंबर रोजी रात्री सुमारे ८.५० वा. मोर्बा रोड कोपऱ्याजवळही मोठा ट्रॅफिक जॅम झाला होता. त्यावेळी एका दुचाकीस्वाराने आमच्या प्रतिनिधींना रस्ता ओलांडताना संतापाने म्हटले—
“पत्रकार साहेब, माणगांवकरांसाठी आत्ता हा रस्ता नाही राहिला आहे!”
हीच स्थिती आता अनेक नागरिकांची भावना व्यक्त करते.
नागरिकांचे प्रश्न गंभीर – बायपासचे काम कधी पूर्ण होणार? वाहतूक समस्येत दिवसेंदिवस वाढत असल्याने नागरिकांचा प्रश्न अधिकच तीव्र होत चालला आहे बायपास रोडचे काम नेमके कधी पूर्ण होणार? इतका विलंब का? वाहतूक पोलीस मनुष्यबळात वाढ का होत नाही? हे प्रश्न आता सर्वसामान्य संभाषणाचा भाग झाले आहेत.
दररोज वाढत चाललेली कोंडी, वाहतुकीचा ताण आणि नागरिकांचा सततचा त्रास यामुळे माणगावकरांचे संयम सुटू लागले आहे. “हा रस्ता आता माणगांवकरांचा राहिला नाही” अशी दुचाकीस्वारांची व्यथा परिस्थितीचे नेमके चित्रण करते. या समस्यांवर तातडीने ठोस उपाययोजना केल्यास माणगावकरांना कायमचा दिलासा मिळू शकतो.